Pwopozisyon yon sitwayen ayisyen 

Se pa depa Konze Ariel ki pi enpòtan, se kisa k ap fèt lè anperè gang yo kite pouvwa a. Kiyès k ap chita bò tab la pou negosye pou pèp ayisyen an pou ranplase bandi ak kostim yo? Kisa k pral fèt ak bandi ak wayabèl kou bandi ak sandal? Èske se menm politichen patripòch tchoul anbasad yo ki pral negosye sou non pèp Ayisien an?

Apre 38 lane salopriti nan tèt peyi a,  pèp Ayisien bezwen kanpo l ak enjerans Core group nan zafè peyi Dayiti. Nan 1986 Clinton te voye Jean Claude Duvalier ale pou l te ka kraze pwodiksyon nasyonal nou sou non demokrasi, an 2024 nou pa dwe pran nan konplo enperyalis kolonyalis yo ankò. Lès Clinton dwe deklare persona non grata an Ayiti, kòm premye desizyon yon konsèy gouvènman (3moun) nou pwopoze pou ranplase pm chanpyon okipasyon an/ Ariel Henry. Chak depatman dwe voye yon reprezantan pou fòme yon asanble nasyonal k ap gen pou misyon pou ratifye desizyon konsèy gouvènman an. Chak depatman dwe fòme konsèy depatmantal yo, ki gen reprezantan chak komin, pou jere depatman yo. Konsèy gouvènman an dwe genyen yon manda 2 zan pou: 
1- Òganize yon fowòm nasyonal pou jwenn yon antant politik siyen pou prezidan fè manda yo ak fè suivi pwojè leta yo
2- Amande Konstitisyon 1987 la pou fè chak depatman otonòm: eleksyon jij, chèf polis, ak yon gouvènè pou chak depatman; entegrasyon tout pitit ak pwojeniti ayisyen nan politik ak devlopman peyi Dayiti kèlkeswa kote y ap viv
3- Prepare yon plan devlòpman pou 25 lane ke chak prezidan dwe respekte kontinwite l
4- Fòme ak enstale yon Konsèy Elektoral Pèmanan ak manda selon konstitisyon an
5- Òganize eleksyon 
Remèt pouvwa bay prezidan eli a nan lane 2026 

Ayisyen dwe pwofite 2 lane tranzisyon sa a (2024-2026) pou mete lòd nan dezòd, eradike gang; netwaye tout fatra nan peyi a; ranfòse polis nasyonal la ak ekipe yon lamè volontè pou pwoteje enterè peyi Dayiti. Nou ka fè sa si nou detèmine ak gen volonte pou nou genyen yon nouvèl Ayiti anba yon lòt kontra sosyal.