Premye jwen 2021, premye jwen 2022, yon lane depi gang yo etabli otorite yo nan Matisan, yon ane depi kout zam otomatik ap chante san kanpe nan antre Sid Pòtoprens la, 365 jou depi gè gang kap batay pou "Teritwa" mete tout moun, san distenksyon nan kanpe lwen.
Premye jwen 2021, premye jwen 2022, yon lane depi gang yo etabli otorite yo nan Matisan, yon ane depi kout zam otomatik ap chante san kanpe nan antre Sid Pòtoprens la, 365 jou depi gè gang kap batay pou "Teritwa" mete tout moun, san distenksyon nan kanpe lwen.
Yon jou tankou jodi a, bandi san fwa ni lwa te deside kanpe goumen youn ak lòt nan Matisan, Vilaj de Dye, Gran Ravin ak Tibwa. Yon batay ki ta gen pou sant enterè "Teritwa". Men, ki pa san konsekans sou lavi moun, ki pa sispann viktim de tout sòt de represyon anba men bandi ki bloke fonksyonnman plis pase 4 depatman ki fòme blòk gran Sid peyi d Ayiti a, (Nip, Sid, Grandans, Sidès...). Enpeche moun fè ale vini, manje pa antre, dola ap vale teren sou goud, lavi chè, razè pandan grangou a menm vin pi rèd.
Konfli sa a n ap raple te oblije plis pase 2 000 sitwayen kite kay yo nan Matisan pou al pran refij nan Sant Espòtif Kafou san konte kantite lòt, pèsòn moun pa rive kalkile ki te kite po yo anba bal belijeran yo, chen manje kadav yo. Lekòl fèmen, legliz pa fonksyone, lopital kanpe travay, komisarya tout bagay fèmen, anfen pa gen lavi nan Matisan. Mesye dam ak zam ilegal yo touye, vyole, fouye machin, kidnape moun jan yo vle, pyès moun pa mande yo sa yo pot pou vann.
Yo rele l "VAR", "Kafou Lanmò," Matisan pa pot bon nouvèl menm. Senp sitwayen pran katouch, komèsan, elèv lekòl, inivèsitè, pwofesè, medsen, polisye tonbe anba bal. Bagay yo grav! Tout sa a la! anba bab Leta ki sèlman kontante l fè chowòf ak pwomès ki pa kanpe sou anyen. Okontrè, bandi yo met menm reprezantan Etatik yo nan fè rout raje lè pou yo rann yo nan Sid peyi a. Jis kilè peyi a ap sispann reve lapè Matisan? Aprè konbyen tan ap gen yon Leta kap konn dwa granmoun li, pou kontre kare bandi ak libere rout Sid la pou aktivite yo reprann dwa yo?
