Editorial
Publication 30 Novembre 2020
18 November 2020
Mwa novanm, mwa Vètyè. Yon mwa ki chaje siyifikasyon pou nou pèp Ayisyen, pou tout lòt pèp nwa sou la tè e pou tout pèp alawonnbadè . Nan dat 18 novanm 1803, lame endijèn nou an mennen yon kokenn chenn konba kont lame franse a ki te gen nan tèt li jeneral Rochambeau. Se ak anpil fyète, yon emosyon fò, Xaragua Magazine ap komemore kokenn chenn moman istorik saa, epi tou ap salye memwa tout potorik fanm ak gason ki te kanpe goumen pou rive jwenn bout rejim esklavajis la. Anpil kout kanno te gwonde pi fò pase loraj, fòs lame kolon yo te dedouble pou kwape deboulonnay revolisyon esklav yo. Gwo fòs atak ak rezistans lame endijèn nan te fè lame franse te vin oblije bat ba douvan kalite boulvari Nèg ak Nègès vannyan ki te jire pou yo viv lib oubyen pou yo te mouri. Se te yon sèman san kondisyon, san machacha, san gwo zòtèy peze. Yon sèman je nan je, 7 koupe las.
Chak fwa nou antre nan listwa nou, nou jwenn grandè, nou jwenn fyète. Nou jwenn tou, tèt ansanm ak diyite. Nou jwenn nan listwa nou, yon flanm rezistans limen tou wouj, ki fè nou pa pè angaje nou nan batay pou defann dwa moun, tout moun.
Xaragua Magazine, nan tout jefò la p fè pou mete an valè sa nou ye ak sa nou reprezante kòm pèp, pwofite nan mwa novanm saa, rafrechi memwa nou sou jan Batay Vètyè ki te vin bay lavi nou yon lòt dimansyon. Vètyè se pou nou yon gwo viktwa sou rejim lesklavajis, men se tou anpil sakrifis zansèt nou te fè pou kite eritaj saa pou nou. Yo pat pè mouri paske yo te konprann ke sa yo tap andire kòm esklav la, te mete yo pi ba ke bèt. Lè nap sonje Vètyè, nou gen byen vivan nan lespri nou kijan tout son lanbi revilisyon yo te gen yon sèl randevou, yon sèl bout, ki se viktwa saa.
Pandan lespri brav zansèt nou yo ap travèse nou ak yon bon jan van solidarite, nap pwofite tire lareverans pou fanm riral, fanm peysàn nou yo, fanm yo di ki andeyò yo. Se te jounen mondyal pou onore yo, dat ki te 15 oktòb la. Se yon moman pou nou raple ke pandan tout lit pou revilisyon an, e nan Batay Vètyè a tou, te gen anpil fanm brav tou ki te goumen ak tout fòs kouraj yo pou rache dwa libète nou nan men mouche Blan. Fanm sa nou toujou jwenn yo, nan kay, nan mache, nan jaden, sou do machin. Chapo ba pou yo.
Yon listwa revolisyonè, yon pèp revolisyonè, yon destine revolisyonè !!!!
Aidez Xaragua Magazine à rester indépendant
Rejoignez cette communauté qui aide les journalistes et collaborateurs de Xaragua Magazine à garder leur liberté de pensée
Impliquez-vous en faisant un don
